الشاعر أمين الديب يكتب........... لا للمحاكمات العسكريه

لا للمحاكمات العسكريه

تحت هذا الشعار كتب الشاعر امين الديب أخر أشعاره

**********

يا نحو فين الناس
بخوفكوا و عجزكوا
ياللي البوليس و المُعتقل
لغة التحاور عندكم
و مكممين كل الشفاه بالبلطجه
و بأمن يحمي أمنكم
و مكتفين الشعب .. كل الشعب
بحبال وهمكم
بأعلى صوتنا باقول لكم
لو تسمحوا من فضلكم
نسأل سؤال
هل فيه سبب للأعتقال؟!
مع اننا ناس معروفين
و كبار رجال أعمال
و ظننا طول عمرنا
قدام عنيكم من زمان
و بترصدوا كل الكلام
فى الهاتف الارضي و فى الجوال
و بترصدوا حتى اللي بيدور فى الخيال
و بترصدوا كل الللى موجود فى البيوت
حتي اللعب بتوع العيال
و الف مرة بتجسس
و بتسألوا مليون سؤال
و تحققوا و تدققوا و بتعرفوا
مطرح دبيب النمل
فوق سفح الجبال
و احلف يمين
ان الجميع متأكدين
بالذات كبير البصاصين
أموالنا جت جهد و عرق
و فلوسنا م المال الحلال
و لا عمرها كانت منح
و لا عمرها كانت غسيل أموال
و الشعب عارف اننا
عاوزين يادوب رضا ربنا
مش محتاجين
نرضي اليهود
*******
و لا فينا خاين او جاسوس
و لا خدنا قرض من البنوك
و هربنا و معانا الفلوس
و لا كنا تُجار ممنوعات
و لا بعنا مره مخدرات
و لا من بتوع العبارات
و لا من بتوع الرقاصات
و طبعنا غير طبعكم
و صحيح نخالف رأيكم
لاكننا مش طمعانين
ناخدوا الكراسي بعدكم
و كلكم متأكدين..
ان الكراسي مكسره
و كلها بتجيب ورا
*******
طب ايه جرى.. يا هلترا
فيه اي واحد مننا
راح و اشترى..
شركات بأموال اليهود
و فلوسنا كانت سمسره.؟
و ازاي و ليه
مبتسألوش عن مال ساويرس
ولا عز و مين و مين
و جات منين..
و فى أى مشروع و أى مله و أى دين
جواسيس و ممدوح اسماعيل
يتحاكموا مدنيين
و احنا اللى اخوان مسلمين
متدنيين
و اساسنا مدنيين
القاضي حكم عسكرى
و تقول لمين
و تعيد لمين
سيبها بس لربنا
و ربنا عالمفترى
و ان حد مات أو حد عاش
ميهمناش
أهم شىء الشعب عارف اننا
عاوزين يا دوب رضا ربنا
مش محتاجين ان اليهود ترتاح لنا
أهم شيء بيهمنا
الشعب يعرف سكته و لا بد من توعيته
يعرف يحقق رغبته
و مقاومته لناس بتنهب ثروته
و تبان عزيمته و همته
و ساعتها يفرض كلمته
و يقولها بصراحه
من غير كسوف و لا خوف
و بنفس مرتاحه
و تكون عشان ربنا
وماتكونش جراحه
*******
و مش عشان اكل عيشنا
نمحى عقيدتنا
و نطاطي للظلم
و لا نفرضش رؤيتنا
دا الرزق من ربنا
موجود فى زرعتنا
و العمر و الرزق
متجدد فى صفحتنا
رزقك فى ايد ربنا
مش ايد عدونا
ملعون ابو اللقمه
لو تنزل بكرامتنا
ملعون ابوه الرغيف
لو ذل عزتنا
ملعون ابوه الدولار
لو جه بذل و عار
ملعون أبوه اللى يستسلم
للأستعمار
ملعون أبوها الحياه
لو سجن للأحرار
و الموت و لا العار
و لا الأنجاس تدوس بيتنا
جسم العرب قطعوه
بقى تُلتُميت حته
و الراس بقت وحدها
مفصوله من الجته
لا ودان بتسمع..
و لا بتشم نتانتها
و لسانها مشلول
و لا بينطق كلمتها
و لا عينها بتشوف طشاش
و لا شايفه سكتها
فرحانه اكمنها
مسنوده عاليه لفوق
*******
يا خلق فوقوا بقي
و قولوها لاجل يفوق
الراس ماتنفعش أبدا
أو بدون جته
ايه اللى فاضل
عشان الخلق تبكي عليه
اقولك ايه و لا ايه
الشعب شاف بعنيه
تزوير ونهب و غلا
و عصابه دايسه عليه
و لسه قال ايه !!
يقولك عهد حريه
و يحاكمك العسكريه
للخصوم من ايه ؟!
*******
يا ريت تفوقوا بقي
قبل الاوان ما يفوت
عورتكوا بانت
و سقط كل ورق التوت
قلناها و مدويه
من جوه بطن الحوت
يا مكتفين الشعوب
بالقسوه و الجبروت
يا مشتتين المطر
كل الشجر بيموت
ملعون ابوه السكوت
الشعب خاب ظنه
ملعون ابوه السكوت
متفكروش انه
لامواخذه خوف منكم
أو من ظلام سجنكم
الطير عرف خُنه
و ان كان على المعتقل
مايهمناش منه
صدق اللى قال فى المثل
اللى اختشوا ماتوا
و ان حكم ظالم
فى رب فوق منه

ترقبوا احدث كتابات الشاعر امين الديب

..

..

قريبا ان شاء الله سيتم نشر القصيدة الجديدة للشاعر الموهوب امين الديب

..

..

القصيدة باختصار تتحدث عن المحاكمات العسكرية و عن رفض الكاتب لها

كما تحكي عن الوضع الراهن فى البلاد و الاحوال السيئة بها

..

..

نترككم مع المقدمه

....

*****************

..

يا رب

..

يا رب اجعل كلامى قمر

.

فى الضلمه للحيران

..

و اجعل كلامى حكم

..

ينطقها كل لسان

..

و اجعل كلام فرح

..

مايجبش وراه احزان

..

و يكون امل للشباب

..

يحميه من التوهان

..

و تعود لمصر العظيمه

..

كل كرامتها

.

و تعود هيبتها

..

بفضل الواحد الديان

..

و مصر تصبح أمان

و بلاد لكل الناس

..

و لا يبقي فيها معتقل

..

و لا يبقي فيها سجان

......

11 ساعه فى صحراء الهايكستب

احدى عشر ساعه فى صحراء الهايكستب



احدى عشر ساعه فى الحر الشديد
احدى عشر ساعه بدون طعام
احدى عشر ساعه بدون ماء كافى
احدى عشر ساعه نشاهد مسرحيه وهميه يمثلها القاضى و مساعديه بكل سذاجه




بدايه صعبه

بدأ اليوم فى تمام الساعه التاسعه صباحا , حيث تواجد الاهالى و وسائل الاعلام . و لكن الاهالى واجهوا صعوبة شديدة فى الدخول و فى الحصول على التصريحات, حتى المحامين لم يدخلوا جميعهم و حتي من دخل واجه صعوبات عديده و عانى معاناة شديده للحصول على التصريح.

بدأ الدخول فى حوالى الساعه الحادية عشر بأهالى المعتقلين من الدرجه الاولى فقط , و تبعهم بعض المحامين , و استمر موظفين التصريحات فى اعطاء التصريحات للمحامين لوقت قد يصل الى ساعه ثم عادت للأهالى من الدرجه الثانيه و الاقارب.

وصلنا الى قاعة المحكمه لنجد الأصلاحيين الشرفاء فى هذا القفص الحقير الذى لا يليق بمكانتهم و من حولهم الاهالى متعلقون بالاسوار ليظفروا بكلمة او حتى نظره من ذويهم . ظل الحال هكذا الى ان ارتفع صوت ربانى من داخل القفص , صوت شجى ايمانى يردد الاذان , فتبينت فأذا به صوت الاصلاحى المهندس احمد النحاس , أذن و رددت القاعة وراءه الاذان ثم بدأت الصلاة من داخل القفص و نحن ورائهم.

و بدات المهزله

و فى حوالى الساعه الواحده و النصف دخل القاضى قاعة المحكمة و بدأت المهزله كالعاده بالنداء على اسماء المعتقلين لمعرفة الغياب و الحضور. اخذ القاضي يلقي بالتهم الساذجة السخيفه التى لا اصل لها و لا دليل . ثم قرر ان يبدأ بفك الاحراز و لكن الاستاذ عبد المنعم استوقفه و طلب منه الاستماع الى الدفاع اولا. و شرع الدفاع يطعن فى دستورية المحكمه و يطلب وقف هذه المهزله.و لكن طلبه باء بالرفض المباشر دون اى مداولات أو تشاور. و طلب القاضي ان يبدأ بفك الاحراز و لكن الدفاع رفض , و اخذ عدة محامين يطعنون ثانية و يرفضون فكرة فك الاحراز . و بين كل محامى و الاخر يصيح القاضي قائلا: " ها يا استاذ عبد المنعم نفك الاحراز ؟ ", و يجيبه الاستاذ " لا مش دلوقتي يا ريس ". الى ان قالها مرة فرد عليه عبد المنعم " احنا طعنا يا ريس و طعننا اترفض دون اي مداولات لذا على المحكمة الموقره ان تفعل ما تريد " .

اخيرا هفتح الكراتين

ففرح القاضي بالأذن و اخذ يفتح الكراتين و يفك الاحراز وحده تماما دون ان يراه الدفاع او الاهالى او حتي المتهمون نفسهم , فقطعه الدفاع معترضا و طلب ان يحضر المتهم و معه المحامي ليتاكدوا من الاحراز و ليبدوا ملاحظاتهم عليها. فوافق القاضى و امر الشرطه العسكريه بان تُخرج المهندس خيرت الشاطر من القفص , فذهبوا ليحضروه و لكنهم كانوا يريدون ان يقيضوا يداه الشريفه فرفض و قال لن اخرج مقيد اليدين فأمر القاضي ان يخرج دون قيوض.

و فى ترقب شديد من الاهالى اذا بأسد الدعوه يخرج من القفص و ترتفع اصوات التصفيق الشديد بالقاعه ترحيبا به.
ثم تم فك احرازه و التى اتضح ان معظمها ليس ملكا له و اول مرة يراها و عندما حاول قول هذا رد القاضي بأن الملاحظات تُدون فى ورقه و تُقدم للقاضي ثم عاد الى القفص .

كيف تستمر محاكمه مشكوك فى دستوريتها ؟؟!!

و أخذ المهندس خيرت يخاطب القاضي قائلا: " يا سيادة القاضي دلوقتى هيئة الدفاع قدمت دفاعها القانونى و الدستورى و لكن دعنى اُخاطب العقول, كيف تستمر محاكمه مشكوك فى دستوريتها ؟؟!! المسلسل ده اتكرر معايا قبل كده سنة 1995 و الى الان لم يُنظر فى الطعن المُقدم ضد احالة المدنيين للمحاكمه العسكريه و مع ذلك استمر النظر فى القضية و تم الحكم على بخمس سنوات و على زملائي بثلاث سنوات , فماذا اذا تم النظر فى هذا الطعن الان و ثبت عدم احقية محاكمتى عسكريا , من سيعوضنى عن هذه الخمس سنوات الضائعه من عمرى ؟؟ من سيعوض ابنائى و اهلى؟؟ , أرجوك يا سيادة القاضي لا نريد تكرار هذه المأساة مرة اُخرى, و يجب ان تعلم جيدا ان حبسنا هذا فى رقبتكم , فكل مرة تُجدد فيها و تعطينا شهر و نصف فنصبح امانه فى عنقك , و الامر ليس شهرا و نصف فقط بل ثلاثة اشهر فى 33 مظلوم يعنى 99 شهر تُحاسب عليها انت و من معك.

و يستمر فك الاحراز

و استمر فك الاحراز و نُودي بالحج حسن مالك و الذى تم فتح خمس كراتين ليست ملكه و لا يعرف عنها اي شيء بالاضافه الى ان معُظم الاوراق ليست له و معظم الشركات التى ذُكرت ليس له اي صله بها و قد نفى الحاج حسن ان يكون مشاركا فى اى دار نشر. ثم نُودي على المهندس احمد شوشه و باقى المعتقلين و اخذت القاعة تهدأ رويدا رويدا, و يتحول الامر الى روتين ممل يقوم به القاضي فى فك الاحراز. و لكن رغم طول الوقت و حرارة الجو و قلة المياه و التى ان وثجدت فهى ساخنة الا انه كان هناك جوا من الهدوء و الرضا فنرى انه تحقق قوله تعالى " و لننزلن سكينة عليهم" . فأذا نادى القاضي احد الاسماء اخذ الحضور يصفقون بشدة و الاخوة خلف الاسوار يصفرون بحرارة تحية لزميلهم مما اثار حفيظة القاضي و جعله يقول للاستاذ عبد المنعم " لو سمحت بلاش المشهد ده يتكرر تانى" .

رغم الظلم ..... برضوا هنعيش مبسوطين


و من المواقف الطريفة عندما نادي القاضي على المحاسب مصطفي سالم فبدأ الاهالى بالتصفيق و المعتقلين بالصفير و لكن ليس كالعادة بل بنغمة موسيقية و اذا به يخرج من القفص و هو يجري مع هذه الموسيقي مما جعل القاعه كلها تضحك حتى القاضي لم يستطع ان يمسك نفسه بل ضحك ايضا, فرغم شدة الموقف و صعوبته و خطورته , رغم حرارة الجو و عدم وجود مراوح كافية, رغم الشعور بالظلم , الا ان الله سبحانه و تعالى ييسر الامور علينا و يهون الامر لأننا ما فعلنا هذا و ما ضحينا هكذا الا فى سبيل الله و فى سبيل رفعة دينه.

رحمة و ألفه مفيش بعد كده

من اكثر المشاهد التى اثرت فى هذا اليوم مدى اخوة المعتقلين و مودتهم و رحمتهم ببعضهم البعض , فقد كان الجو شديد الحرارة و المراوح قليله جدا و لذا انتشرت فى القاعه المراوح اليدويه و بينما كان يتم فك احد الاحراز و اذا بعينى تأتى على المهندس أيمن عبد الغنى لأجده يمسك احد هذه المراوح و يهوي بها و لكن عندما تبينت و جدت انه لم يكن يهوى لنفسه و لكنه كان يهوى للمهندس احمد شوشه!!! فيا للحب فى الله, يا لجمال الاخوة والمودة فهو لم يؤثره بالمروحة فقط و لكنه أبى الا ان يهوي عليه هو بنفسه فرغم شدة الموقف الا ان الحب فى الله و الايثار لا يُهجر ابدا, فكيف تُوجه مثل هذه التهم لهؤلاء الاشراف, كيف يمكن لأحد منهم ان يقوم بغسيل اموال او القيام بأعمال ارهابية!!!!!!!!

و فى الختام

و خُتمت الجلسه بكلمة احد المحامين الذي لخص القضيه و طالب بالافراج الفورى عن المعتقلين, ثم تبعه محام اخر يطلب رحمة المحكمه للمعتقلين حسن زلط و عصام حشيش نظرا لتدهور حالتهم الصحية, فالحاج حسن زلط صحته سيئة و يجب ان يخضع لثلاث عمليات فوريه واحدة فى قلبه و اخرى فى المرارة و الثالثه فى عينه. اما الاستاذ عصام فقد سقط مغشيا عليه فى اثناء الكلمه و تم الكشف عليه فورا من احد الاطباء المثعتقلين.
و طالب المحامى بحسن معاملتهم و الرعاية الطبيه الجيدة لهم, و نقلهم الة القصر العينى الفرنسي بدلا من القصر العينى القديم, لأن الفرنسي به امكانيات احسن لأجراء هذه العمليات.

عمر علاء أبو العلا

يا رب

بكرة عـنـدنـا عـسـكـريه

يعنى لا بد من التضحيـه

كلوا يـدعـى كـلوا يصلي

لازم نـــاخــد الــحــريـه

يكره ان شاء الله المحاكمه العسكريه الثالثه

قصدي المهزله الثالثه

مش عارف اقول ايه

.

هل هيستمر الظلم

.

هل هتحصل مهزله تانى

.

هل القاضي معاه برضوا قرار جاي بيه من البيت هيعمل مسرحيه و بعدين يقولوا

.

الواقع بيقول اه

.

بس مش عايزين نتشائم

.

خير ان شاء الله

.

احنا ثقتنا فى الله كبيره

.

احنا بنروح بالأمل و بنرجع بالرضا

.

بس انتوا ادعولنا ربنا يرفع الظلم ده يا رب

.

همَّ الإخوان ظباط جيش ؟؟؟

هذا الزجل الرائع من ابداع اخى و حبيبي

محمد شمس الدين

بارك الله فيه و جعله فى ميزان حسناته

......................

نصيحه : اسمعه ما تقرأهوش

..............

اسمع من هنااااااا

.......................

****************

...................
إزّاي واحد مدني يعيش
يحكم ضده ظابط جيش ؟
كان دَه سؤال بيدور فـ خيالي
عمّال ييجي كتير على بالي
بعد ما كُلُّه اتكلِّم فيه
بقى موضوع الوقت الحالي
قُلت لنفسي أي سؤال
ليه تفسير وحلول تتقال
الحلال هوَّ الحلال
بس يا نفسي تعالي نحِل
يِمكن نِلقى حقيقة تهل
لما نجيبها يمين وشمال
نَفسي قالتلي طب اسمع منِّي
هسأل وِانتَ تجاوِب عنِّي
وهفكَّرلك فيها بالراحة
والأسئلة هتكون بصراحة
وِانتَ تقُللي بقى التحليل
إزاي يعني فـ أرض النيل
المشهورة بالمواويل
اللي بتحكي عن ثقافتها
ولحضارتها عُمْر طويل
إزاي يسجنوا ناس أحرار
علشان دينهم رفعوا شعار
إزاي وجْيرانهم واخوانهم
قالوا عليهم ناس أبرار
واللي يعوزهم، بتميزهم
كانوا يساعدوا صغار وكبار
إزاي يبقوا دكاترة جامعة
يعتقلوهم ليل ونهار
ياخدوا فلوسهم. يمنعوا ناسهم
ولا حَدّ بيِبدي استنكار
إزاي وقضاءهم برَّأهم
ولا فيهم خاين غدَّار
إزاي علشان الإخوان
يبقى البطش قصاد أفكار
ولتأثيرهم يبقى مصيرهم
بايت جوَّة سجون العار
إزاي يحصل ده فـ بلدنا
أرض الأزهر أرض المدْنَى
اللي بنوها زمان أجدادنا
وبنتغنَّى بحريتها
ويغنوها كمان لولادنا
معقول دَه يكون فِـ الأوطان ؟
فيها الظلم بقى السرطان ؟
ولَّا بيحكم فيها شِيطان ؟
كِدبوا لما قالولنا أَخَدنا
منصب فـ حقوق الإنسان ؟
ولَّا العادلي ماهوَّاش عادلي
ولا يعرف للعدل مكان ؟
إزاي يبقى وزير لوزارة
أوزارها بتوْزِن بُلدان ؟
إزاي بيسيب التعذيب
والتعذيب أشكال والوان ؟
إزاي أهل الدين ساكتين
وسكوتهم ولِّد نسيان ؟
إزاي حتى البني آدمين
مش عارفين يعملوا عصيان ؟
هيَّ دِه فعلاً بتكون مصر ؟
فيها سجونها وفيها القصر ؟
ولّا عمينا وضحكوا علينا
ولَّا العُمر اتقصَّر قَصْر ؟
إزاي تبقى بلدنا دِه بس ؟
قُمت شاخط وبعِلْو الحس
كلمة زيادة ومش هاسمحلِك
أنا غلطان انّ انا بسمعلِك
بَسّ يا نفسي يا مُتَجنيَّة
ليه على بلدِك شايفِك جايَّة
دَنا أفديها بكل ماليَّة
وارفَع القُبَّعة لكلامها
أقصد أرفع يعني طاقِيَّة
كُلّ كلامِك مليان قُبْح
وانا شاكك فيكي من الصُبح
مرة تسِرِّي ومرة تنادي
مرة تخوضي فـ إسم بلادي
إسمعي مِنِّي بقى الكلمه دِه
إسم بلادي داهِنْها ببويا
وِابن ترابها يِبقى أخويا
عقلي مَنْسي بغِنوة نانسي
إن انا مصري كمان وأبويا
ماتعلِّمتيش حسن النية ؟
مافهمتيش معنى الوطنية ؟
ولا دُقتي طعم القومية ؟
ولا كَلتي الفول والطعمية ؟
ماغرستيش فـ أصالة بَلَدِك
ماوقفتيش فـ طابور جمعية ؟
إخص عليكي يا نفسي إخص
أثَّر فيكي زمن الرُخص
نَفسي قالتلي استنَّى عليَّا
إشتري منِّي شويّة شويّة
فين الغلط فـ اللي اتقال
كُل حكايتي سأَلت سؤال
مِش بَتسلَّى ولا بَتبلَّى
مالَك داخل فيَّا شمال ؟
قُلت لَإنِك مش فـ الصورة
والناس فـ سجون المعمورة
كلنا عارفينهم وِحشين
وكمان جماعتهم محظورة
نَفسي قالتلي عرفت منين ؟
أنا قُلتلها من الجرانين
من مقالات الصحفيين
اللي بيِكتبوا فـ "الأهرام"
وبيِمْلوا التقارير أرقام
ضد الناس المحظورين
وكأنها جَت من الداخلية
ليه مِش سامعة للناس دِيَّة ؟
نَفسي قالتلي من غير ليه
إنت يا بابا جرالَك إيه ؟
أهرام إيه اللي بتحكي عليه ؟
هوَّا القارِئ يعني جموسة
لمَّا يصدَّق أحمد موسى
ولَّا يصدَّق سمسم بيه ؟
دَ انا نِفسي أروح الأهرام
وادخُل على قِسم الإجرام
علشان اعلَّق يافطة كبيرة
أكتب فيها الكِدب حرام
قُلت ماهيَّاش آخر الكون
برضُه بشوف التليفزيون
قالِت طب ماتقُللِي الفُولَة
قُلتِلها فـ قناتنا الأولى
نَفسي قالِتلي يخرب بيتك
من برنامج البيت بيتك
اللي الريِّس أحسن ريِّس
كُلُّه كويِّس كُلُّه كويِّس
ومفيش أي وزير بيهيِّس
لو يحتاجهم مرة ضروري
يبقوا المخرَج لِيه من الزَنقة
فـ استغفالنا وسام جمهوري
وقُريِّب أوسكار في الخَنْقة
مش دَه اللي انتَ بتحكي عليه ؟
قُلت لنَفسي بَقُللِك إيه
معروف يعني انّ الإخوان
أُس البَلْوَى فـ كُل مكان
نَفسي قالِتلي عندك حق
وانا مِش ناوية أقُلَّك لأ
بس اشربلَك بُؤِّين شاي
وِانتَ تقُللِي افهمها ازاي
مِن أسوان للدلتا وسينا
إزاي همَّ سبب بلاوينا
عملُم لِينا البحر طحينة ؟
في البرنامج عَن مآسينا
قَعدوا يغنُّوا وصوروا لِينا
كُل مدينة جوَّة سفينة
والحرية هتِبقى المينا
والأموال راح تِكتر بِينا
وعرِفنا بعد الاستفتا
إن حامينا كان حرامينا
واللي قالولنا إحنا اخواتكوا
سِكنوا الشَّرم وراحوا مارينا
بعدين يِشتموا فـ اللي يعارض
ويزرُّوا فيهُم إسفينا ؟
قُللِي الإخوان عملُم إيه ؟
عملوا إيه في الناس أو فينا ؟
باعوا الأنفلونزا بشيك
قام بوباء مبعوت للديك
علشان يِبقى مرض فـ فراخ
أو فـ حمام معمول بفْرِيك ؟
ولَّا العار فـ الأسعار
اللي اترَفَعِت ليل ونهار
جُم رفعوها بالكواريك ؟
غيَّروا فـ نظام دَفع ضرايب
يبقى عجايب ويكون دايِب
كُل مواطن عندُه بوتيك ؟
عيُّوا الشعب وقالوا ميرسي
بعد ما دَخَلُوا بفيرس سي
خللُوا وباء السل وشيك ؟
ولَّا حبيبهُم لمَّا يسيبهُم
يِبقى عقابهُم عَند غضبهُم
يِِخلق مـ التلاكيك تلاكيك ؟
سرقوا مالنا ؟ قتلوا عيالنا ؟
فـ العبَّارة كانوا شْرِيك ؟
ولَّا باعولنا وجُم حطُّولنا
فـ الألبان بودرة سيراميك ؟
قُللِي الإخوان عملُم إيه ؟
وبيستاهلوا السجن عليه ؟
خانوا بلادهم بالمشاريع ؟
مع صُهيون عملوا التطبيع ؟
صدَّروا غاز والغاز بيضيع ؟
ولَّا بدون أسباب جُم حاصروا
حملة للمليون توقيع ؟
قُللِي ياخويا عملوا إيه
وبيستاهلوا الحظر عليه ؟
خللُوا نظام الطب خفيف
والمسقبل يِبقى مُخيف
قالوا الدور عَـ الدكتور
نِلغِيلُه سَنَة التكليف ؟
وَانا لا بَعَارض ولا بأيِّد
ولا جايَـ امثِّل بَبْني واشيِّد
ولا دَ كلام من عَندي بَقولُه
قالُه الدكتور حمدي السيِّد
قُللي الإخوان عملوا إيه
وبيستاهلوا المَنع عليه ؟
حَكَموا شعوبهُم زي عصابة ؟
جوَّة الغابة تدوس فـ غَلابَة
في الميزانية حكِّموا رَهْط ؟
ياخُد منها ويلهط لَهْط
ويعيش شعب بينقُر نَقْر
نُصُّه أسفل خَطّ الفَقْر
فيه رجَّالة بتعيش عالَة
وتعاني بالعجز بطالة
قالوا يا ريتنا بنون النسوة
بِندوَّر على لُقمة وكِسوة
وِان نتلاقَى فـ مصر بمِهنة
نِلقى جنيهنا مابقاش يِسوى
ويقُللك عوِّمنا جنيه
قُللي الإخوان عملوا إيه
وبيستاهلوا البطش عليه ؟
خربوا نظام البحث العلمي ؟
تبقى الخطة عِلمَك عِلمي
تِشبِه موقَف أحمد حلمي
إستروبيا وخلطة سوبيا
زي ما شُفتها يعني فـ حِلمي
أصل انا حِلمي بيِبقى حقيقة
شُفت العِلم فـ بلدي حريقة
أستاذ جامعة مش لاقي ياكُل
والناس بتخرَّجُه من ضِيقة
عالِم، عامِل بَحث تقيل
علشان يِخدِم أرض النيل
ساب الناس، يعمل أبحاث
واصِل كُل نهارُه بلِيل
وجَزَاة عِلمُه يشوف الويل.
لازِم تيجي وزارة تعايِن
واختِم خِتمَك دَه مش بايِن
وادفع تاني يجوز تِدَّايِن
وروتين يِقطَع منُّه الحيل
والتهزِيئ بَقى زي السيل
قال غلطان وحمار وبْديل
مانا لو عايِز أعرف قيمتي
هامشي واهاجِر زي زويل
وسلامنا لكل البلدان
عملوا إيه تاني الإخوان ؟
أنا زهقانة من التقطيم
مش هاتكلِّم عـ التعليم
على طالِب مصر المنحوس
اللي زمان كان زي الموس
مش هنفصَّل ولا هندوس
وكفاية اقللَك عِشنا وشُفنا
طُلاب جامعة بياخدوا دروس
قللي يا سيدي عملوا إيه ؟
ده نموذج لبلدنا فـ صورة
تتصوَّر بيه المعمورة
ماشية طريق مرصوف بخطورة
والقائد رجليه مكسورة
ومُساعدينُه بيلعبوا كورة
والركاب مَلُّوا من الفُرجة
واخِر ماتش كان اسمُه الشورى
واللي يفكَّر إنُّه يحذَّر
يبقوا دول الناس المحظورة
يقطعوا عنهم أكل العيش
وقاضيهم يحكم بشويش
جوَّة محاكم ويَّا عساكر
أصل الإخوان ظباط جيش
شر بليِّتنا اللي يضحَّك
واللي يسيب عيبُه ويتمحَّك
ولَّا سعتَّك رأيك إيه ؟
مالك يعني، ساكت ليه ؟
قُلت وعايزة أقُللِك إيه
عايزة أقول على نفسي عبيط
إني أسيب زيِّك بيزِيط
ويشرَّدلي ويعمل سِيط
ساكت يمكن تفهمي وِانتي
فاتحالي مُسجِّل تخبيط
أنا يا حبيبتي ورايا عيال
أبقى ازَّاي على سوء الحال
ولا على صفر المونديال
فكَّرت انِّي هريَّح بال
وِانِّي هقول لمراكب سيري
لما اتكلِّم ويَّا ضميري
بس يا نفسي ممكن اهون
واتشحطط فـ بلاد الكون
وفـ أحوالي هَكُون الدُّون
أنا مش ناوي أعيش مسجون
ولا هسمعلِك مهما يكون
والحكمة قديمة ومعروفة
اللي يكلِّم روحُه مجنون
نفسي قالتلِي كلمة أخيرة
كلمة واحدة ماهيش كبيرة
قالت نصرنا بِيك أو بيَّا
واوعى تفكَّر إنُّه وصية
واقفة عليك أو واقفة عليَّا
شُفت فـ جو العسكرية
رابطة أطفال الحرية
كانت بسمة فـ ليلنا الحالك
اللي أمينها أنس ابو مالك
طلعت من جنب السجَّان
فيها الحكمة وفيها بيان
شافُه الناس كل الأزمان
يفتكروها هتبقى نهاية
بس دِه بذرة كل بداية
بيها بيبدأ فجر جديد
جَيّ ينوَّر درب وليد
يتولِّد ويَّاه أجيال
تِفدي الدين بالروح والمال
مش هيهيبها إسم مبارك
ولا هتسمِّي ولادها جمال

زوروا مدونته:

http://www.mohamedshams.blogspot.com/

http://www.hamsawy.blogspot.com

أعرب مراسل المدونة عن فرحة بظهور مدونة جديدة تزيد رصيد مدونات الإخوان المسلمين، حمساوى هى مدونة تعبر عن مشاعرها بتصاميم رائعة أعدها مدونها ، إليكم أيها القرآء بعض منها

http://www.hamsawy.blogspot.com/